സിഗ്മണ്ട് ഫ്രോയിഡ് – ധ്രുവദേശ രാത്രിയിലെ സൂര്യോദയം (ജീവചരിത്രം)
കവിതാ രാമന്‍
നിയതം ബുക്സ്
വില : 125 രൂപ
ആധുനിക മനുഷ്യന്റെ ചിന്താസരണിയില്‍ , മാനസിക വികാര വിചാരലോകങ്ങളില്‍ ഉരുത്തിരിയുന്ന എല്ലാ രാസപരിണാമങ്ങള്‍ക്കും കാര്യകാരണഭൂതങ്ങളെ തിരയുകയും വിശകലനം ചെയ്യുകയും നിയന്ത്രിക്കാനും പരിഹരിക്കാനും കഴിയുന്ന മാനസികരോഗ വിഭാഗത്തിന്റെ അറിയപ്പെടുന്ന ചരിത്രത്തില്‍ ഒരു പേരില്‍ നിന്നുമാണ് എല്ലാ പഠനങ്ങളും മുന്നോട്ട് പോകുന്നതെന്ന് കാണാം . സിഗ്മണ്ട് ഫ്രോയിഡ് എന്ന മനുഷ്യന്‍ , മനുഷ്യ മനസ്സിന്റെ ദുരൂഹതകളിലേക്ക് സഞ്ചരിക്കുകയും അവയ്ക്കു തന്റേതായ കണ്ടുപിടിത്തങ്ങളും നിഗമനങ്ങളും കൊണ്ട് അടിസ്ഥാനമിടുകയും ചെയ്ത ഒരാള്‍ ആണ് . ആധുനിക മനശാസ്ത്ര ശാഖയുടെ അടിത്തറ അവിടെയാണ് തുടങ്ങിയതെന്ന് കാണാം . ഹിപ്നോട്ടിസം എന്നൊരു ഒറ്റ ചികിത്സയും , ഒരുപാട് അന്ധവിശ്വാസങ്ങളും മാത്രം കൈമുതലായിരുന്ന മാനസികാരോഗ്യ മേഖലയെ ഉണര്‍ത്തുവാനും കൂടുതല്‍ നവീകരണങ്ങള്‍ നടത്തിക്കാനും കഴിഞ്ഞത് ഫ്രോയിഡിന്റെ പഠനങ്ങള്‍ നല്കിയ അടിസ്ഥാന ബോധം തന്നെയാണ് . ജീവിച്ചിരിക്കെ അംഗീകരിക്കപ്പെടാതെ പോയ ഒരു മനുഷ്യനാണ് അല്ലെങ്കില്‍ സ്വന്തം കണ്ടുപിടിത്തങ്ങള്‍ വേണ്ടവിധം ജനങ്ങളില്‍ എത്തിക്കാന്‍ കഴിയാതെ പോയ ഒരു മനുഷ്യനാണ് അദ്ദേഹം . കഠിനമായ ജൂതവിരോധം നിലനിന്ന ആ കാലഘട്ടത്തില്‍ അദ്ദേഹത്തെ അംഗീകരിക്കാന്‍ മടിച്ച ഒരു സമൂഹമാണ് ചുറ്റിനും ഉണ്ടായിരുന്നത് . വായിൽ അര്‍ബുദം വന്ന് എണ്‍പതാം വയസ്സില്‍ മരണത്തെ പുല്‍കുന്നത് വരെ ഈ അവഗണനയുടെ കയ്പുനീര്‍ കുടിക്കേണ്ടി വന്ന ഒരാള്‍ . ആ മനുഷ്യന്റെ ജീവിതവും പ്രവര്‍ത്തനങ്ങളും അക്കാലത്തിന്റെ മത സാമൂഹിക രാഷ്ട്രീയ അവസ്ഥകളും വിശകലനം ചെയ്യുന്ന ഒരു ലഘു ജീവചരിത്ര കൃതിയാണ് കവിതാ രാമന്‍ തയ്യാറാക്കിയ "സിഗ്മണ്ട് ഫ്രോയിഡ് – ധ്രുവദേശ രാത്രിയിലെ സൂര്യോദയം " എന്ന ഈ പുസ്തകം. മഹാനായ ആ മനുഷ്യന്റെ ജീവിതത്തെ വളരെ സരളമായി സംക്ഷിപ്തമായി അവതരിപ്പിച്ചിരിക്കുന്ന ഈ പുസ്തകം ഭാഷയും അവതരണവും കൊണ്ട് നല്ല നിലവാരം പുലര്‍ത്തിയതായി കാണാം . ഒരു മനുഷ്യനെന്ന നിലയില്‍ സിഗ്മണ്ട് ഫ്രോയിഡ് എന്തെന്ന് അറിയാനും ഒരു ഡോക്ടര്‍ അഥവാ ഗവേഷകന്‍ എന്ന നിലയില്‍ അദ്ദേഹം എന്തെന്നറിയാനും ഒരുപോലെ ഉപയുക്തമായതാണ് ഈ പുസ്തകം. മനശാസ്ത്ര സംബന്ധമായ പല വിഷയങ്ങളിലും സ്വന്തമായ അഭിപ്രായം ഉള്ളതുകൊണ്ടു തന്നെ സമൂഹം അവഗണിക്കുകയും അവമതിക്കുകയും ചെയ്തുവെങ്കിലും തന്റെ കാഴ്ചപ്പാടിനെ തിരുത്താനോ ക്ഷമ പറയാനോ അദ്ദേഹം തയ്യാറായിരുന്നില്ല . അതുമൂലം നഷ്ടമായ പദവികളും സൗഹൃദങ്ങളും ഒന്നും തന്നെ അദ്ദേഹത്തെ നിരാശനാക്കിയതുമില്ല . അതേസമയം മാനസിക വിചാരങ്ങളുടെ പഠനത്തില്‍ മുഴുകിയ ഫ്രോയിഡ് പോലും ചില അന്ധവിശ്വാസങ്ങളുടെ പിടിയില്‍ ആയിരുന്നു എന്നതും കൗതുകമുണര്‍ത്തിയ വായനയായിരുന്നു . അദ്ദേഹത്തിന്റെ പ്രധാനപ്പെട്ട രചനകളും കണ്ടുപിടിത്തങ്ങളും പരിചയപ്പെടുത്തിയത് കൂടുതല്‍ വായിക്കാന്‍ അറിയാന്‍ ആഗ്രഹിക്കുന്നവര്‍ക്ക് വളരെ ഉപകാരമായ ഒന്നായി കണക്കാക്കാന്‍ കഴിയും. നല്ലൊരു പരിചയപ്പെടുത്തല്‍ ആണ് ഈ പുസ്തകം . ആശംസകളോടെ ബിജു ജി നാഥ് വര്‍ക്കല
No comments:
Post a Comment