കവിത :കള്ളിമുള്ച്ചെടി
രചന : ബിജു ജി നാഥ് വര്ക്കല
കള്ളിമുള്ച്ചെടിയുടെ കണ്ണുനീര് കണ്ടു നീ
തെല്ലും അകലരുതേ...തെല്ലും അകലരുതേ!
ലോകത്തിന് ദൃഷ്ടിയില് മുള്മുനമൂലമെന്നും
അവഗണിച്ചവള്, തന് മിഴിയൊഴുകുമ്പോള് (കള്ളിമുള്...)
ഏറെ പ്രിയമോടെ നിന്നാടയില് നാണത്താല്
കൈനഖം കോര്ത്തെന്നാല് ഓര്ക്കുക നീ.
അത്രമേല് നിന്നെയൊരു മിത്രമായ് കണ്ടാകാം
ഹൃത്തടം കാട്ടുവാന് ശ്രമിക്കയാ പാവം. (കള്ളിമുള്....)
കെട്ടിഞാത്തുന്നു ദൃഷ്ടിദോഷമകറ്റുവാന്
ഉമ്മറക്കോലായില് കോലമായ് എന്നും
ഇഷ്ടമില്ലാത്തൊരു കാഴ്ചയായി ജീവിതം
പരിഭവമില്ലാതെ ജീവിക്കുന്നേകാന്തം. (കള്ളിമുള്....)
തന്നിലേ യൌവ്വനസത്തയെ മോഹിച്ച്
വന്നടുക്കുന്ന സൃഗാലരെ അകറ്റുവാന്
തന്വിയവള് അണിയും കവചം കണ്ടു നീ
കോപതാപം കൊണ്ടകലരുതേ കഷ്ടം! (കള്ളിമുള് ...)
No comments:
Post a Comment