ഏകലോകം

ഏകലോകം

..................

ചൂണ്ടുവിരലിൽ കോർത്തു ഞാൻ നിർത്തുന്നു

മൂളി വന്നൊരീ കാറ്റിനെ ഞാനിന്ന് .

ഓർമ്മയുണ്ടോ നിനക്കെന്നെ കാലമേ ?

ഓർത്തു വയ്ക്കാൻ മടിയെന്ത് ചൊല്ലുക.

കണ്ടു നില്ക്കുവാൻ നീ ചൊല്ലിയെന്നോട്

കാഴ്ച മാത്രമാണെന്നുടെ ധർമ്മമെ -

ന്നാർത്തു വിളിച്ചു സമൂഹത്തിനൊപ്പവും.

ഇന്ന് നിന്റെയാ ഉടലിന്ന് കാവലായി

വന്നു നിന്നത് ഞാനെന്നറിഞ്ഞുവോ.

ഇല്ല തമ്മിൽ പക്ഷപാതിത്വങ്ങൾ

ഇല്ല ശക്തി തൻ വേർതിരിവൊന്നുമേ

മാറ്റി നിർത്തേണ്ടതല്ലെന്റെ ഉടലിൻ

മാറ്റമൊന്നുമേ കുറവല്ലെന്നോർക്കുക.

ചാക്കു കെട്ടിൽ പൊതിഞ്ഞടുക്കള കോണിൽ

കാത്തു വയ്ക്കേണ്ട ഉടലല്ല ഞാനുമേ.

ചേർന്ന് തോളുരുമി ഒന്നിച്ച് വിളിക്കുവാൻ

മുദ്രാവാക്യങ്ങൾ പലതല്ല നിശ്ചയം.

ഏക രാഷ്ട്രത്തെ ആഗ്രഹിക്കുമ്പോൾ

ഏകപൗരത്വമാശിക്കുമ്പോൾ

ഒന്ന് ചേർന്ന് നിൽക്കും നമ്മളെങ്കിൽ

കണ്ടിടട്ടെ ഒരു കനവു കൂടി.

ലിംഗനീതി തൻ സുന്ദരലോകം!

.... ബിജു.ജി.നാഥ് വർക്കല