ഒടുക്കം ........ പമ്മൻ

ഒടുക്കം (നോവൽ)
പമ്മൻ (ആർ. പരമേശ്വര മേനോൻ )
ഡി.സി.ബുക്സ്
വില.90 രൂപ.

ഒരു കാലത്തു വായനശാലകളിൽ ലഭ്യമല്ലാതിരുന്നതും ,ലഭ്യമാകുന്നവയിൽ പേജുകൾ നഷ്ടമായിരുന്നതും ഏറ്റവും കൂടുതൽ വായന ലഭിച്ചിരുന്നതുമായ ഒരു എഴുത്തുകാരനായിരുന്നു പമ്മൻ . കൊച്ചു പുസ്തകങ്ങൾ വാങ്ങി ഒളിച്ചു വച്ചു വായിച്ചിരുന്ന അതേ രഹസ്യാത്മകതയോടെ പമ്മന്റെ പുസ്തകങ്ങൾ വായിക്കപ്പെട്ടിരുന്നു. കോളിളക്കം സൃഷ്ടിച്ച 'ഭ്രാന്ത് ' എന്ന നോവൽ മാധവിക്കുട്ടിക്ക് നല്കിയ പ്രശസ്തിയും ഒട്ടും കുറവല്ല എന്നു തന്നെ പറയാം. ഒടുവിൽ വായനക്കാരുടെ ആവശ്യം മുൻനിർത്തി 'സെക്സ് പമ്മന്റെ നോവലുകളിൽ ' എന്നൊരു പുസ്തകം പോലുമിറങ്ങുകയുണ്ടായി.  മലയാളിയുടെ ലൈംഗികവികാരത്തിന്റെ കരിമരുന്നു പുരകൾക്ക് പമ്മന്റെ സമ്മാനമായിരുന്നു തീപ്പൊരികൾ പോലെയാ നോവലുകൾ. ഇന്ന് സോഷ്യൽ മീഡിയകളും ബ്ലോഗുകളും ഇൻറർനെറ്റിന്റെ സാധ്യതകളും പമ്മനെ വായിക്കുന്നതിൽ നിന്നും പിറകോട്ടു നടത്തിച്ചു എന്നു പൂർണ്ണമായും പറയാനാകില്ല. പമ്മനെ വായിക്കുന്നു എന്നു പറയുന്നതു പോലും മലയാളിക്കു അശ്ലീലമാണ്.
പമ്മൻ എഴുതിയവ അശ്ലീലമായി മാത്രം വായിച്ചതിന്റെ പോരായ്മയാണ് പമ്മനെ കുപ്രസിദ്ധനാക്കിയത്. പ്രതിഭയുള്ള ഒരു എഴുത്തുകാരൻ തന്നെയാണ് അദ്ദേഹം. സമകാലികർക്കിടയിൽ പക്ഷേ അദ്ദേഹത്തിന്റെ നെഗറ്റീവു ആയി കണക്കാക്കപ്പെട്ടത്  പൈങ്കിളി നോവലുകൾ കറക്കിപ്പറയാൻ ശ്രമിച്ചത് വെട്ടിത്തുറന്നു പറഞ്ഞു എന്നതു മാത്രമാണ്. പമ്മൻ എഴുതിയ മറ്റൊരു നോവലാണ് " ഒടുക്കം". പമ്മന്റെ സെക്സ് ടച്ച് പ്രതീക്ഷിച്ചു വരുന്ന വായനക്കാർക്ക്  നിരാശ നല്കുന്ന പുസ്തകമാണ് ഇത്. പമ്മന്റെ മറ്റെല്ലാ നോവലുകളുമെന്ന പോലെ ഇതും സ്ത്രീപക്ഷ രചനകളാണ്. സ്ത്രീയുടെ മനസ്സിന്റെ വിവിധ കോണുകളെ വ്യത്യസ്ഥമായ രീതികളിൽ നോക്കിക്കാണാൻ ശ്രമിക്കുന്ന പമ്മന്റെ രചനാ ചതുരത ഇതിലും കാണാം.

ഇന്ദു എന്ന ഇന്ദിരയുടെ ജീവിതമാണ് ഈ നോവലിന്റെ ഇതിവൃത്തം. പഴയ നായർ തറവാടുകളുടെ ജീവിത പരിസരങ്ങളും ഉയർച്ചതാഴ്ചകളും ഒക്കെ ഇതിൽ വ്യക്തമായി അടയാളപ്പെടുത്തിയിട്ടുണ്ട്. കൂട്ടുകുടുംബ വ്യവസ്ഥിതിയിൽ നിന്നും മരുമക്കത്തായ രീതികളിൽ നിന്നും വേർപെട്ടു ഇന്ദുവും കുടുംബവും മാറിത്താമസിക്കുന്നതും ഭിന്ന സ്വഭാവക്കാരായ അച്ഛനമ്മമാരിൽ നിന്നും ചുറ്റുപാടുമുള്ള സ്വന്ത ബന്ധങ്ങളിൽ നിന്നും ഇന്ദു തന്നെ പരുവപ്പെടുത്തിയെടുക്കുന്നത് തികച്ചും വ്യത്യസ്ഥയായ ഒരു സ്ത്രീയായാണ്.  മറ്റുള്ളവരുടെ സൗകര്യമോ ഇഷ്ടമോ നോക്കി ഒന്നും ചെയ്യാൻ ഇഷ്ടമല്ല എന്നുറക്കെ പ്രഖ്യാപിക്കുന്ന ഇന്ദു തന്റെ ജീവിതം വലിയൊരു പരാജയം ആണ് എന്ന് തിരിച്ചറിയുന്നതേയില്ല.
കുടുംബ ബന്ധങ്ങളുടെ ഭദ്രതയും സ്നേഹപാശങ്ങളും കൊടുക്കൽ വാങ്ങലുകളും പരിചയിച്ചിട്ടില്ലാത്ത ഇന്ദു നല്ല വിദ്യാഭ്യാസം നേടിയെങ്കിലും ജീവിതത്തിൻ പരാജയം തന്നെയായിരുന്നു. ലൈംഗികത എന്നത് ഇന്ദുവിന് അപരിചിതമായ ഒരു മേഖലയായിരുന്നു. അതിനാൽ തന്നെ ഭർത്താവുമൊത്തുള്ള ദീർഘകാല ദാമ്പത്യം എന്നത് രണ്ട് അപരിചിതരുടെ ഒന്നിച്ചുള്ള വാസം മാത്രമായിരുന്നു. എപ്പോഴോ ഒക്കെയായി വിരളമായി സംഭവിച്ചിട്ടുള്ള വേദനാപൂർവ്വമായ രതി അവൾക്കൊരിക്കലും ആസ്വാദ്യകരമായിരുന്നില്ല. ശിവദാസമേനോൻ എന്ന ഭർത്താവിനും അവളെ ഒന്നിനും നിർബന്ധിക്കുകയെന്നത് ഇഷ്ടമല്ലായിരുന്നു. അയാൾ നല്ലൊരു മനസ്സിന്നുടമയായിരുന്നു. തന്റെ ഓഫീസ് സ്റ്റാഫിനോടുണ്ടായ പ്രണയം പോലും എത്ര കാവ്യാത്മകമായാണ് അയാൾ കൈകാര്യം ചെയ്തത് എന്നു കാണാം.
ഇന്ദുവിന്റെ ജീവിതം ചില സ്തോഭജനകമായ അവസ്ഥകളിൽ ചെന്നുപെടുകയും തുടർന്നവൾ തന്നിലേക്കു നോക്കുകയും ചെയ്യുന്ന ഘട്ടത്തിലെത്തിച്ചു നോവൽ അവസാനിപ്പിക്കുന്നു
ചിലയിടങ്ങളിൽ പറയുന്ന കാര്യങ്ങൾ മറ്റൊരിടത്ത് പറയുമ്പോൾ മാറിപ്പോകുന്ന ഒരു സ്ഥിതി വിശേഷം നോവലിൽ ഉണ്ടാകുന്നുണ്ട്. പലപ്പോഴും കഥാപാത്രങ്ങളുടെ മനോവ്യാപാരങ്ങളിലൂടെ കടന്നു പോകുമ്പോൾ വിസ്താര ദൈർഘ്യം മൂലം വായനയിൽ വിരസത തോന്നിച്ചു എങ്കിലും പൊതുവിൽ നല്ലൊരു നോവൽ തന്നെയാണ് ഒടുക്കം എന്ന പമ്മന്റെ ഈ പുസ്തകം .ആശംസകളോടെ ബി.ജി.എൻ വർക്കല