സ്നേഹത്തിന്റെ വിലാസം

തിരഞ്ഞു മടുത്ത പാതകൾ
കണ്ടു മടുത്ത കാഴ്ചകൾ
അറിഞ്ഞു കേട്ട കഥകൾ
ഒക്കെയും വാഴ്ത്തപ്പെടലുകൾ മാത്രം.

നീയൊന്നു വീണാൽ
ഒരു മുളളു കൊണ്ടാൽ
പകലിരവു തിരയുന്നവൻ
ഞാനെന്നാകിലും പ്രിയേ ...

ഒരു ചെറിയ (വലിയ ) വേദന-
ക്കടലിൽ ഞാനൊറ്റയ്ക്കു
തുഴയുവാൻ ബദ്ധപ്പെടുന്ന നാളിൽ
നിന്റെ പരിഹാസശബ്ദം മരുന്നാകുന്നു.!

ചിതലരിച്ച ഓർമ്മകളെന്നു നീയെന്നെ
തട്ടിയുടച്ചു കളഞ്ഞെന്ന നിശ്വാ'സത്താൽ
പതിയെ കണ്ണുകളടച്ചു വിശ്രമിക്കുമ്പോൾ
തനുവിലുമേറെ നൊന്തെന്റെ മനമല്ലോ.

പ്രതീക്ഷകൾക്കു എനിക്കെന്നും നിന്റെ രൂപം,
നിന്റെ നാമം , നീ തന്ന വാക്കുകൾ മാത്രം.
പരാതികൾക്കിടയില്ലാതെ ഞാനിന്നും
പുലരിയിൽ നിന്നെ പ്രണയത്താലാശ്ലേഷിക്കുന്നു.
....... ബിജു. ജി. നാഥ് വർക്കല